काठमाडौं, २०८१ जेठ २९ – लोकप्रिय गायिका एलिना चौहानले मंगलबार सामाजिक सञ्जालमा रुँदै गरेको भिडियो पोस्ट गरेपछि धेरैको ध्यान खिचेको छ । भिडियोमा उनको अनुहारमा नीलडाम देखिन्छ ।
भिडियोमा एलिनाले हिन्दी गीतमा अभिनय गरेकी छिन् । गीतको बोलले “धन, सम्पत्ति, गाडी, नाम, घर, काम सबै तिम्रो राख, मलाई मात्र आदर दे” भन्ने भाव बोकेको छ ।
उक्त भिडियोको क्याप्सनमा एलिनाले लेखेकी छिन्, “एक सच्चा मान्छेले रिसाएर पनि तपाईंलाई आदर गर्नेछ ।” यो क्याप्सनले धेरैलाई जिज्ञासु बनाएको छ ।
गत वैशाखमा विवाह गरेकी एलिनाको यो रोएको भिडियो सामाजिक सञ्जालमा भाइरल भएपछि धेरैले उनको वैवाहिक जीवनमा समस्या परेको अनुमान लगाएका छन् । कतिपयले पति-पत्नीबीच झगडा परेको हो कि भनेर टिप्पणी गरेका छन् ।
यता, केहीले भने एलिनाले गीतको भावअनुरूप अभिनय गरेको मात्र हुनसक्छ भन्ने अनुमान लगाएका छन् ।
यसैबीच, एलिनाले आफ्ना दर्शकहरूलाई आश्वस्त पार्दै भनेकी छिन्, “यो केवल अभिनय हो, गीत मन परेर । नराम्रो नसोच्नु होला ।”
वैशाखमा विवाह गरेकी एलिना हाल श्रीमानसँगै अष्ट्रेलियामा छिन् । उनी त्यहाँ स्थायी बसोबास गर्ने योजनामा रहेको अनुमान गरिएको छ ।
यसै महिना उनले अष्ट्रेलियाको एक रेकर्डिङ स्टुडियोमा तीन गीत रेकर्ड गरेकी थिइन् । अष्ट्रेलिया जानुअघि उनले नेपालमा आवश्यक परे सांगीतिक कार्यक्रमका लागि आउने बताएकी थिइन् ।
एलिनाको भिडियोले सामाजिक सञ्जालमा विभिन्न प्रतिक्रियाहरू पाएको छ । कतिपयले उनको कलाको प्रशंसा गरेका छन् भने कतिपयले उनको व्यक्तिगत जीवनबारे जिज्ञासा राखेका छन् ।
