पाल्पाको तिनाउ-३ दोभानमा बुधबार साँझ स्कुटर दुर्घटना हुँदा एक जनाको मृत्यु भएको छ । दुर्घटनामा परी ज्यान गुमाउने २१ वर्षीय विवेक अधिकारी रुपन्देही जिल्ला तिलोत्तमा नगरपालिका ४ डिङ्गानगरका बासिन्दा हुन।
जिल्ला प्रहरी कार्यालय पाल्पाका सूचना अधिकृत सुगन्ध श्रेष्ठका अनुसार, बुटवलबाट पाल्पा आउँदै गरेको स्कुटर (Lu ८६ Pa ६५१) सोही दिशाबाट आउँदै गरेको ट्रक (Lu २ ख ५३७३) सँग ठोक्किएको थियो । दुर्घटनामा गम्भीर घाइते भएका विवेकलाई उपचारको लागि लुम्बिनी अञ्चल अस्पताल लगिएको भएपनि उपचारको क्रममा मृत्यु भएको हो ।
उक्त स्कुटरमा पछाडि सवार विवेककी बहिनी १७ वर्षीया रश्मि अधिकारी पनि घाइते भएकी छिन् । रश्मिको हालको अवस्था भने खुल्न सकेन ।
प्रहरीले ट्रक चालकलाई नियन्त्रणमा लिएर दुर्घटनाको कारणबारे थप अनुसन्धान गरिरहेको छ ।
